O BNG denuncia no Parlamento a escaseza de prazas nas escolas infantís vilalbesas
plosa2A deputada nacionalista Carme Aira presentou no Parlamento Galego unha serie de iniciativas para que as familias vilalbesas non vexan mermadas as súas capacidades de conciliación. A Vila de Vilalba, cabeceira da terra Chá experimentou un crecemento demográfico no ano pasado ao que temos que darlle a benvida por ser un elemento fundamental para a pervivencia de comarcas rurais no futuro. Habitualmente o número de nacementos viña sendo de 60 ao ano pero o ano pasado producíronse uns 104 o que fixo saltar as costuras da atención á infancia dentro do concello.
Vilalba conta con dúas unidades de asistencia á infancia, unha delas pertencente ao concello e outra a denominada Galiña Azul, que ofertaron en total 30 prazas en total de educación infantil para nenas e nenos de 0 a 3 anos. Na Galiña Azul quedaron 25 solicitudes pendentes de praza e na Escola Infantil do concello unhas 11.
A resposta dada pola Dirección Xeral de Familia, Infancia e Dinamización Demográfica “ignora as queixas das familias e a lista de espera aducindo que ao ser unha etapa de ensino non obrigatorio, e polo tanto de carácter voluntario, a demanda está suficientemente cuberta” explica a deputada nacionalista, o cal resulta inexplicable como resposta da Dirección Xeral de Familia, Infancia e Dinamización Demográfica, “xa que a súa actitude e disposición a non dar os servizos requiridos pola cidadanía e un desincentivador demográfico xa que conduce ás familias a trasladarse a cidades que conten con servizos de conciliación da vida familiar e laboral e non resten oportunidades educativas ás súas crianzas” afirma Carme Aira
Medidas para facilitar a conciliación
No Decreto 239/2005, polo que se regulan os centros de menores e os centros de atención á infancia, indícase que en Concellos de maior poboación a autorización estará vencellada á necesidade de novas prazas asistenciais e á súa complementariedade coas ofertadas polas escolas infantís de 0 a 3 anos.” Neste caso está Vilalba, e as súas crianzas de 0-3 anos e as súas familias deben ter dereito ás mesmas prestacións que outros concellos nos que se creou un PAI de modo extraordinario como aconteceu recentemente no Concello de O Grove no que comparten xestión a Xunta de Galicia e o propio Concello.
“É precioso que a Xunta de Galiza interveña, en coordinación co concello se fora preciso, para dar atención á situación e ás persoas, sen esperar a que sigan nacendo crianzas este ano e o próximo que incrementarán as listas de espera, e para isto é importante que se actúe xa con medidas extraordinarias para atender esta situación extraordinaria tamén, e que as medidas que se tomen sexan para atender as necesidades dos próximos anos tamén” concluíu Carme Aira.