Abre en Outeiro de Rei unha mostra sobre a violencia de xénero
plosa2A casa da cultura de Outeiro de Rei acolle a mostra Á violencia de xénero dille non!, unha exposición gráfica ilustrada dirixida especialmente á mocidade coa que axudar a recoñecer, identificar e rexeitar condutas sexistas e nocivas nas súas relacións afectivas.
Trátase dunha iniciativa da Consellería de Promoción do Emprego e Igualdade, a través da Secretaría Xeral de Igualdade, no marco do Acordo de Colaboración coa Federación Galega de Municipios e Provincias de Galicia. A mostra forma parte das actividades enmarcadas na Rede de entidades locais contra a violencia de xénero da que forma parte este concello.
Os once paneis que integran a exposición reflicten formas de exercer a violencia que case sempre pasan desapercibidas a quen a sofren, e nalgúns casos, tamén a quen exerce por tratarse dun modelo normalizado pola cultura e a sociedade que cala con forza na adolescencia.
Á violencia de xénero dille non! pretende axudar á mocidade para recoñecer, identificar e rexeitar condutas tóxicas como o control, a manipulación, o abuso, a sextorsión, a chantaxe emocional e outras formas de malos tratos.
Sensibilizar á mocidade na construción dunha sociedade na que a liberdade, a tolerancia e o respecto sexan a base das relacións, dunha sociedade que faga fronte á submisión, á desigualdade e á violencia son outros dos obxectivos que se pretende acadar con esta exposición.
Esta exposición poderá visitarse na casa da cultura de Outeiro de Rei ata o vindeiro 8 de xaneiro de 2024, en horario de 11:00 a 14:00 horas.